Interlingua usate in le posta
Reclamo sur inveloppes ha essite multo usate pro informar
super interlingua.
Per Thomas Breinstrup
Tote le via de New York in le SUA a Dresden in alora Germania del Est
in 1968, iste banderola reclamava pro interlingua. Le expedition
esseva inviate de New York le 5 de februario 1968, accompaniate per le
stampa postal dicente "Interlingua - lingua norma -
interlingua" e esseva recipite per un interessato de interlingua
in Dresden, Kurt Neumann.
"Tal stampas certo esseva usate per IALA (le International
Auxiliary Language Association, red.) e per su successor Division de Interlingua de Science Service, que distribueva
grande amontas de posta a tote le mundo. Ma io non pote memorar que io personalmente ha notate un tal stampa. Post le morte de
dr. Gode le sol cambio esseva que le function del Division de Interlingua ha cessate, ma tote le activitates del Union Mundial pro Interlingua e le associationes national pro Interlingua continuava. De facto: le ver labor pro diffunder Interlingua in le mundo comenciava post iste tempore. P.ex. tote le litteratura in Interlingua, circa 150 libros e 100 manuales e dictionarios, esseva publicate post le morte de dr.
Gode," dice Ingvar
Stenström, pionero de interlingua e secretario del Societate
Svedese pro Interlingua.
Invios postal totevia non esseva secur de arrivar a lor
destinatarios ante le cadita del Muro de Berlin.
"Le representante de UMI in le "DDR" in 1968 esseva Walter Roc Raédler. Le regime confiscava le letteras e magazines que UMI expediva a ille, e ille habeva grande difficultates. Le mesme problemas existeva in
Tchecoslovachia. Dunque non solmente esperantistas esseva victimas de persecution. Nunc sperabilemente nos pote haber inter nos
Communication sin frontieras, como dice le motto del UMI,"
dice Ingvar Stenström.
Revidite: 2006-12-29
|
