Interlingua 2001: Union Danese pro Interlingua

Novem annos, multissime articulos e annuncios in le jornales, un congresso international de endocrinologia con 684 summarios in interlingua, un magazin medical con summarios in interlingua, manuales e dictionarios.

DIU

Dansk Interlingua Union esseva fundate le 7 de novembre 1960 como le prime organisation nordic de interlingua.
Adresse in Internet:
www.interlingua.dk

Solmente post isto esseva fundate le Union Danese pro Interlingua (Dansk Interlingua Union, DIU) le 7 de novembre 1960. DIU es le organisation nordic le plus vetule de interlingua. Le quotisation annual esseva al fundation duo coronas (hodie 0,23 dollars)!

Hodie, le DIU es active in multe dominios. Le publicitate pro interlingua via le pressa ha essite notabile. Nulle nove dictionario de parolas estranier o nulle nove encyclopedia o lexico appare in danese sin automaticamente includer le notion "interlingua". Le DIU establiva in 1999 su sito in Internet, www.interlingua.dk, que debe esser plus developpate, e recentemente on ha comenciate le redaction del revidite dictionario danese-interlingua.

Le interlinguistas danese sempre ha essite fortemente ingagiate, anque in le labor international pro interlingua. Ja ab le initio, Poul Moth (1896-1976), qui esseva professor de schola e le prime representante scandinave pro interlingua, laborava pro establir contactos scandinave. Bent Andersen, le actual vice-presidente del DIU, esseva durante decennios le administrator del Union Mundial pro Interlingua. H.P. Frodelund (1912-1996) redigeva durante 30 annos desde 1966 le magazin professional del UMI, Currero, que in 1987 fusionava con le private Heraldo de Interlingua e deveniva Panorama con le suprasignate como redactor. E le "gentleman del pressa", Jørgen Kofod-Jensen, le presidente del DIU desde 1985, es appellate assi post le publication de centos, si non milles de articulos super interlingua.

Ja in novembre 1959, le prime passo al fundation del DIU esseva prendite per le edition del circular "Notas de Interlingua", cuje nomine esseva fortemente inspirate del "Novas de Interlingua", editate per le Association pro International Lingua Auxiliar (IALA). Iste circular se ha developpate desde alora e ha cambiate nomine alcun vices, ma illo ha continuate sin interruption e se appella hodie "Actualitates – Interlingua i Norden". Le trimestral es hodie le organo commun del quatro organisationes nordic de interlingua in Danmark, Svedia, Norvegia e Finlandia.

Al Prime Congresso International de Endocrinologia in Copenhagen in julio 1960 participava 1.500 scientistas ab 30-40 paises. Le duo pioneros danese, Poul Moth e Bjarner Svejgaard traduceva con dr. Alexander Gode, le ultime director de recercas de IALA, le multe summarios in interlingua, cata uno de 400-500 parolas. Le publicitate date al congresso habeva un effecto multo positive a interlingua. Assi le mensual anglophone, Danish Medical Bulletin, introduceva summarios in interlingua de omne su articulos. Le prime presidente del DIU, medico Jørgen Michelsen, prendeva cura del traductiones, desde maio 1965 Bent Andersen, le tresorero, assumeva le carga.

Daneses celebra 40 annos in union

Daneses celebra
40 annos in union